Kulħadd ħaqqu familja li tħobbu.
Hekk qalilna Dasier D’Amato, żagħżugħ ta’ għoxrin sena li ilu jiġi fostered minn meta kellu biss sitt snin.
Huwa qasam l-istorja tiegħu ma’ ONE News, fid-dawl tal-kampanja li għaddejja bħalissa mill-Fondazzjoni għas-Servizzi tal-Ħarsien Soċjali, biex aktar individwi, koppji u familji, jiftħu qalbhom u jagħtu l-imħabba lil tfal bi problemi soċjali.
Dasier qalilna li ta’ sitt snin, missieru kellu jidħol il-ħabs u kien ġie deċiż li jingħaqad ma’ familja għall-fostering għal perjodu ta’ sitt xhur sakemm jiskonta s-sentenza.
Għal raġunijiet diversi ma setax imur lura ma’ missieru, u allura wara li għaddew is-sitt xhur, mar jgħix ma’ ommu. Iżda l-problemi hawnhekk ma naqsux.
Qal, “Wara tmien xhur ma bqajtx magħha għaliex kien hemm battibekki bejni u bejnha, imbagħad daħal il-partner tagħha beda jsawwatni u l-għada mort għand il-head of school, għidtilha li għandi dahri juġagħni u sabitli dahri kollu tbenġil. Ċemplet lis-social worker u qaltilha x’għandi. Is-social worker mingħajr ma ħasbitha darbtejn, qabditni, ċemplet lill-foster carers li kienu jiffosterjawni meta missieri kien il-ħabs u mort magħhom mill-ewwel.”
Minn dakinhar, Dasier u l-foster parents tiegħu, ma ħarsux lura.
Qal, “Il-foster parents tawni ħajja ġdida, tawni ħajja li dejjem kont nixtieq, tawni ħajja li jekk kelli bżonn xi ħaġa, tawieli.”
Il-koppja li għażlet li trabbi lil Dasier kellha diġà t-tfal bijoloġiċi, iżda dejjem imxiet bl-istess mod mat-tfal kollha.
Fil-fatt, Dasier jgħidilna li qatt ma ħassu eskluż.
Qal, “Jien mill-ewwel darba li dħalt f’dik id-dar, sibt platt ikel lest fuq il-mejda, lestewli s-sodda mat-tifel tagħhom, jiġifieri dawn ma kinux jafuni. Vera mmur tajjeb magħhom, litteralment aħwa, niġġieldu, nilletikaw, jiġifieri qisni twilidt hemm ġew, just ġejt ftit tard.”
Minkejja din l-esperjenza pożittiva li tat ħajja ġdida lil Dasier, li tiffosterja mhix xi ħaġa faċli.
Kull min hu interessat li jsir foster carer għandu jibda billi jċempel fuq in-numru 1778.
Wara l-ewwel laqgħa, isir kors ta’ seba’ ġimgħat konsekuttivi b’dettalji dwar x’jinvolvi l-fostering.
Jekk koppja jew individwu jagħżlu li jkomplu bil-proċess, isir assessjar minn ħaddiema soċjali, fejn imbagħad jitħejja rapport li jintbagħat lill-bord tal-fostering.
Iltqajna mal-counsellor Johanna Rizzo, mit-tim tal-Fostering fi ħdan id-Direttorat għall-Kura Alternattiva tat-Tfal tal-FSWS.
Hija spjegatilna li meta l-bord jagħżel familja għall-fostering, jara li l-ambjent ikun adattat għat-tifla jew it-tifel inkwistjoni.
Qalet, “Nippruvaw noqogħdu attenti li l-match nagħmluha tajba – jiġifieri li t-tifel jew it-tifla tiffittja fil-lifestyle ta’ din il-koppja jew individwu, u nimxu minn hemm, jibda l-vjaġġ.”
Hija spjegatilna li kemm tul il-kors u anki waqt il-fostering, il-foster carers jiġu offruti servizzi ta’ counselling.
Ħafna mid-diffikultajiet li jħabbtu wiċċhom magħhom il-koppji f’dan il-vjaġġ, huma marbuta mal-imġiba tat-tfal.
Qalet, “Dawn it-tfal ikollhom it-trawmiet u basket vera tqil u jkunu jridu tqil sapport, għajnuna u gwida, jistaqsu, x’għandi nagħmel biex it-tifel ma jibqax irrabjat? L-imġiba tat-tfal l-iżjed li jkunu jridu gwida u sapport u aħna nenfasizzaw ħafna fuq therapeutic parenting ngħidulu. Jiġifieri dawn it-tfal ikollhom bżonn tip ta’ parenting mhux l-istandard li nafu bih, imma jrid ikun terapewtiku.”
Il-counsellor żiedet tgħid li min jagħżel li jiffosterja, ikun qed jagħti ċans lil tifel jew tifla mingħajr imħabba, jiżviluppa f’individwu li jista’ jiffunzjona fis-soċjetà u jkollu wkoll relazzjonijiet u kapaċitajiet li jħobb.
Minn fomm iż-żagħżugħ innifsu li għadu sal-lum jiġi fostered, jekk hawn min għandu mħabba f’qalbu li jiflaħ jagħti, jagħtiha.
Qal, “Jiena kieku ma kinux dawn il-foster parents li dik l-imħabba żejda li għandhom ġo qalbhom, tawieli, kieku jien illum il-ġurnata ma nafx x’sar minni. It’s nice to have someone, it-tfal kulħadd jixtieq li jkollu dik l-imħabba so why not? Kulħadd mistħoqq li jiġi mrobbi ġo familja li tħobbu. Kulħadd mistħoqq li jkollu dik l-iskola li jixtieq, jiġifieri jiena nemmen li min jista’ jiffosterja u jagħti l-imħabba żejda li għandu, innaqqsu ħafna t-tfal fil-homes u t-tfal ikunu aktar kuntenta.”